काठमाडौं । नेपाली बजारमा सूनको भाउ पहिलो पटक २ लाख रुपैयाँभन्दा बढी पुगेको छ । बिहीबारको तुलनामा शुक्रबार सुनको मूल्यमा प्रतितोला १ हजार २ सय रुपैयाँले बढेको छ ।

नेपाल सुनचाँदी व्यवसायी महासंघका अनुसार आज एक तोला सुनको भाउ २ लाख ६ सय रुपैयाँ निर्धारण भएको छ । बिहीबार एक तोला सुन १ लाख ९९ हजार ४ सयमा किनबेच भएको थियो । यसअघि साउन २४ गते पनि सुनको भाउ १ लाख ९९ हजार ४ सय पुगेको थियो ।

अन्तर्राष्ट्रिय सञ्चारमाध्यमहरूका अनुसार आज प्रतिऔँस सुन ३ हजार ४ सय ८ अमेरिकी डलरमा कारोबार भइरहेको छ । महासंघका अनुसार सुनको भाउ बढ्नुमा मुख्यतया दुई कारण रहेका छन् । अमेरिकी राष्ट्रपति डोनाल्ड ट्रम्पले घोषणा गरेका भन्सार शुल्क अर्थात् ट्यारिफ । अर्को हो, बैंक अफ युकेको ब्याजदर नीति ।

अमेरिकी राष्ट्रपति ट्रम्पले ९० देशमा भन्सार शुल्क बढाएका छन् । ट्रम्पको नीतिले विश्वको आपूर्ति प्रणाली, मूल्य सञ्जाल र कूटनीतिक सम्बन्धमा समेत असर परेको अन्तर्राष्ट्रिय सञ्चारमाध्यमले जनाएका छन् । बैंक अफ युकेले ब्याजदर ०.२५ प्रतिशत घटाएको छ । बैंकले ब्याजदर ४.२५ प्रतिशतबाट घटाएर ४ प्रतिशतमा झारेको अवस्थामा लगानीकर्ता सुनमा आकर्षित भएको देखिन्छ ।