काठमाडौं । नेपाल निर्माण व्यवसायी महासंघको विशेष साधारणसभा सम्पन्न भएको छ । काठमाडौंमा शुक्रबार भएको महासंघको विशेष साधारणसभा संविधानसभा सदस्य जीपछिरिङ लामाले उद्घाटन गरे ।

कार्यक्रममा सम्बोधन गर्दै कांग्रेस नेतासमेत रहेका लामाले मुलुकको निर्माण उद्योग समस्याग्रस्त रहेको बताए । उनले निर्माण व्यवसायीहरू एकताबद्ध भएर आफ्ना हकअधिकारका लागि लड्ने बेला आएको धारणा राखे । कांग्रेस तथा एमालेजस्ता शक्तिशाली दलको सरकार रहेको वर्तमान अवस्थामा ठोस ढंगले निर्माण उद्योगको समस्या सरोकारवाला निकायसमक्ष प्रस्तुत गर्नुपर्नेमा उनको जोड थियो ।

नेपाल निर्माण व्यवसायी महासंघका अध्यक्ष रवि सिंहले आफ्नो नेतृत्वको कार्यसमितिले निर्माण उद्योगको समस्या समाधान गर्न इमानदार प्रयास गरिरहेको बताए । साना ठूला सबै किसिमका निर्माण व्यवसायीहरूको समस्या सम्बोधन गर्ने गरी महासंघको वर्तमान नेतृत्वले काम गरिरहेको अध्यक्ष सिंहको भनाइ थियो ।अध्यक्ष सिंहले महासंघको २६ औं साधारणसभा तथा १३ औं अधिवेशन २०८२ को माघ १५, १६ र १७ गते गर्ने प्रस्ताव गरेका छन् ।

महासंघका सल्लाहकार एवं पूर्वअध्यक्ष सुकुन्तलाल हिराचनले अव्यवहारिक ऐन, नियम तथा मूल्यवृद्धि, म्याद थपमा देखिएको जटिलता लगायतका समस्याबाट निर्माण उद्योग आक्रान्त रहेको बताए । साधारणसभामा प्रतिवेदन पेस गर्दै महासचिव रोशन दाहालले महासंघका अहिलेसम्मका उपलब्धि तथा भावी कार्यक्रम सार्वजनिक गरे । कोषाध्यक्षको तर्फबाट हिरणकुमार श्रेष्ठले प्रतिवेदन पेस गरेका थिए ।

महासचिव दाहाल तथा कोषाध्यक्ष श्रेष्ठको प्रतिवेदन विशेष साधारणसभाले पास गरेको छ । कार्यक्रममा महासंघको मुखपत्र ‘निर्माण समाचार’को प्रमुख अतिथि लामा र महासंघका अध्यक्ष सिंहले संयुक्त रुपमा विमोचन गरेका थिए । साधारणसभामा ७३ जिल्लाका एक हजार प्रतिनिधिहरू सहभागी थिए । नेपाल निर्माण व्यवसायी महासंघमा २४ हजारभन्दा बढी व्यवसायी आबद्ध छन् ।