काठमाडौं, भदौ ३१। ऊर्जा जलस्रोत तथा सिँचाइ मन्त्रालयले १२ वर्षमा २८ हजार ७१३ मेगावाट बिजुली उत्पादन गर्ने लक्ष्य निर्धारण गर्दै कार्ययोजना बनाएको छ । जुन उत्पादनबाट सन् २०३५ सम्म भारतलाई १० हजार, बंगलादेशलाई ५ हजार निर्यात गर्ने र १३ हजार मेगावाट आन्तरिक खपत गरिने कार्ययोजनामा उल्लेख गरेको छ ।

मन्त्रालयका सह–सचिव सन्दिपकुमार देवको संयोजकत्वमा गठित कार्यदलले आर्थिक वर्ष २०७९,८० सम्ममा करिब ४५० मेगावाट, २०८०,८१ सम्म ६०० मेगावाट, २०८५र८६ सम्म ४००० मेगावाट र आर्थिक वर्ष २०९१,९२ सम्म १५ हजार मेगावाट छिमेकी देशहरुमा बिक्री गर्ने प्रतिवेदनमा उल्लेख छ ।

प्रतिवेदन अनुसार छिमेकी राष्ट्रहरुमा बिक्री र आन्तरिकसहित सन् २०३५ सम्ममा कुल माग २८ हजार ७१३ मेगावाट हाराहारीमा पुग्ने उल्लेख छ । मन्त्रालयले सरकारी र निजी क्षेत्रले निर्माण गर्ने आयोजनाको समेत लागत राखेर कार्ययोजना तयार पारेको छ । आन्तरिक खपत बाहेक बाँकी १० हजार मेगावाट भारतले लैजाने र बंगलादेशलाई ५ हजार मेगावाट बिजुली बिक्रीको लक्ष्य लिएको छ ।