काठमाडौं, भदौ १२। चालू आर्थिक वर्षको साउनमा मात्र निर्जीवन बिमा कम्पनीहरुले लघुबिमाद्वारा २९ लाख रुपैयाँ बिमाशुल्क संकलन गरेका छन् । उक्त अवधिमा २ हजार १५ वटा बिमालेख मार्फत १ अर्ब ५६ करोड ७३ लाख रुपैयाँ बिमांक बराबरको बिमा भएको छ । ती बिमालेख मार्फत करिब २९ लाख रुपैयाँ बिमा शुल्क संकलन भएको नेपाल बिमा प्राधिकरणको तथ्यांक छ ।
सञ्चालनमा रहेका ८ वटा निर्जीवन कम्पनी र दुई वटा लुघबिमा कम्पनीद्वारा उल्लिखित बिमा शुल्क संकलन भएको हो । गत साउनमा शिखर इन्स्योरेन्सले सबैभन्दा धेरै ७ सय ४० वटा बिमालेख बिक्री गरेर १ लाख ७२ हजार बिमा शुल्क संकलन गरेको छ । सोही अवधिमा नेको इन्स्योरेन्सले ६ सय ४० वटा बिमालेख बिक्री गरेर १३ लाख १९ हजार बिमा शुल्क संकलन गरेको छ ।
यस्तै, गत साउनमा ओरिएण्टल इन्स्योरेन्सले १० वटा लघु बिमा पोलिसी बिक्री गरी २५ हजार रुपैयाँ, नेसनल इन्स्योरेन्सले ४ वटा बिमालेखमार्फत १ हजार र प्रोटेक्टिभ माइक्रो इन्स्योरेन्स कम्पनीले ८ वटा बिमा लेख बिक्री गरी ३२ हजार रुपैयाँ बिमा शुल्क आर्जन गरेको हो ।
