काठमाडौँ । एमजी मोटरले आफ्नो नयाँ इलेक्ट्रिक एसयूभी ‘साइबर X’ सार्वजनिक गर्ने तयारी गरेको छ। विश्वव्यापी बजारलाई लक्ष्य गरी विकास गरिएको यो मोडललाई कम्पनीले दुई वर्षभित्र उत्पादनमा ल्याउने योजना बनाएको छ।

पहिलो पटक शांघाई अटो शोमा बोल्ड कन्सेप्टका रूपमा देखाइएको साइबर X लाई कम्पनीले मिनी–मर्सिडिज प्रेरित परिवारमैत्री कम्प्याक्ट एसयूभीका रूपमा बजारमा उतार्ने तयारी गरेको हो। एङ्गुलर र बाक्सी डिजाइनसहितको यो मोडल शहरी प्रयोगका लागि उपयुक्त हुने अपेक्षा गरिएको छ। साथै, हल्का अफ–रोडका लागि समेत उपयुक्त हुने गरी यसको ग्राउन्ड क्लियरन्स र डिजाइन तयार गरिएको बताइएको छ।

विश्वबजारमा यसको प्रारम्भिक मूल्य £३०,००० भन्दा कम हुने अनुमान गरिएको छ। बजेटमैत्री मूल्यमा आधुनिक इभी प्रविधि र व्यावहारिक प्रयोग उपलब्ध गराउने लक्ष्यका साथ एमजीले यसलाई सानो एसयूभी खोजिरहेका ग्राहकलाई लक्षित गरेको जनाएको छ।

एमजी मोटर, जुन SAIC मोटर कर्पोरेसनको स्वामित्वमा रहेको ब्रिटिश ब्रान्ड हो, पछिल्ला वर्षहरूमा पेट्रोल, हाइब्रिडदेखि लिएर फुल्ली इलेक्ट्रिक मोडलमार्फत दिगो मोबिलिटीका क्षेत्रमा निरन्तर नयाँ विकल्प प्रस्तुत गर्दै आएको छ।